കൊച്ചിയില്‍ മള്‍ട്ടിലെവല്‍ മാര്‍ക്കറ്റിങ് കമ്പനിയുടെ പേരില്‍ തട്ടിപ്പ് നടക്കുന്നതായി പരാതി. ബിസയര്‍ മാര്‍ക്കറ്റിങ് മണിചെയിന്‍ തട്ടിപ്പ് കേസില്‍ ജാമ്യത്തിലിറങ്ങിയ ചിലരാണ് പുതിയ പേരില്‍ തട്ടിപ്പ് നടത്തുന്നതെന്ന് കൊച്ചി ഡി.സി.പിക്ക് ലഭിച്ച പരാതിയില്‍ പറയുന്നു. പരാതി ഉയര്‍ന്നതോടെ കൂടുതല്‍ പേര്‍ തട്ടിപ്പിനിരയായതായി ആരോപിച്ച് രംഗത്തെത്തുകയാണ്. തൃശൂര്‍ ആസ്ഥാനമായി പ്രവര്‍ത്തിക്കുന്ന ഇവോ ഗ്ലോബല്‍ എന്ന കമ്പനിക്കെതിരെയാണ് പരാതി ഉയരുന്നത്.
കോവിഡ് പ്രതിസന്ധി മുതലെടുത്ത് യുവാക്കളെയും യുവതികളെയും സാമ്പത്തികതട്ടിപ്പിനിരയാക്കുകയാണെന്ന ആരോപണമാണ് ഉയരുന്നത്. ചെറിയ നിക്ഷേപങ്ങൾ തുടങ്ങി വൻ സംഖ്യകൾ വരെ നിക്ഷേപിച്ച് കുറഞ്ഞ കാലയളവിൽ വലിയ ലാഭം ലഭിക്കുമെന്നതാണ് വാഗ്ദാനം.
2011ല്‍ നടന്ന ബിസയര്‍ എന്ന മണി ചെയിന്‍ മാര്‍ക്കറ്റിങ് തട്ടിപ്പ് കേസിലെ പ്രതികളില്‍ ചിലരാണ് ജാമ്യത്തിലിറങ്ങി പുതിയ പേരില്‍ തട്ടിപ്പ് നടത്തുന്നതെന്ന് കാണിച്ച് എറണാകുളം ഡി.സി.പിക്ക് പരാതി ലഭിച്ചിരുന്നു. സംസ്ഥാനത്തിന്‍റെ വിവിധ ഭാഗങ്ങളില്‍ തട്ടിപ്പ് നടന്നിട്ടുണ്ടെന്ന് കാണിച്ച് ഡി.ജി.പിക്കും മുഖ്യമന്ത്രിക്കും പിന്നീട് പരാതി ലഭിക്കുകയുണ്ടായി. ഇതേത്തുടര്‍ന്ന് ഇക്കഴിഞ്ഞ ദിവസം കൊച്ചിയില്‍ പൊലീസ് പരിശോധന നടത്തിയിരുന്നു.
إرسال تعليق